- AD84, fonds Liffran, maître Louis GAUTIER, notaire à Cavaillon (84), 3E 32/457 f°247
- orthographe respectée
Saichent tous p[rese]nt [et] advenir comme ainsin
soyt par le juste jugement de dieu nous
soyons tous mortel a [qu]elques age rien de plus
certain [que] la mort ni chose plus incertaine
que lheure dicelle ce que considerant Guilhen
AVID fils a feu Elies jardinier de Cavall[on]
sain de pensee, sens, vue [et] entandement bien
quil soyt detenu malade dans son lict de
maladie corporelle par le vouloir de dieu
a voulu faire son testement nuncupatif et
dispo[siti]on finalle a la forme [et] maniere que
sensuyt. Cest que lan a la nativite no[tr]e
seigneur mil six centz vingt [et] ung [et] le
vingtiesme jour du mois de mars en p[rese]nce
de moy not[aire] [et] tesmoingns bas nommes este
personne estably ledict Guilhen AVID qui
en premier lieu se munissant du venerable
signe de la s[ainc]te croix disant In Nominé,
Patris, [et] fily [et] Spiritus s[anc]ti amen a recommande
son ame a dieu tout puissant no[tr]e seigneur
Jesus [Christ] a la tres s[ainc]te [et] sacree Vierge
Marie [et] a tout les s[ainc]ts et s[ainc]tes du
paradis les priant que quand son ame
partira de son corps la vueilhent accompagne
au royaulme celeste avec la troupe des
bienheureux et a esleu la sepulture de
sondict corps dans leglise des r[everen]ds peres
Prescheurs dud[ict] Cavall[on] [et] au tombeau de
feu Ellies son pere et a prins pour
son ame pour une fois tant sulement
la somme de douse flourins monoye
courant au p[rese]nt Comtat ou telle au[tr]e
somme [que] sera advise par ses herit[iers]
cy bas nommes pour estre employe [et]
distribue aux funerailhes [et] obseques de
sondict corps [et] en oeuvres pies en redempt[io]n
de ses pesches. Et a legue [et] legue
ledict testateur par droict de legat [que]
institu[ti]on particuliere a Louyse VIALLE
sa fame pour une fois tant sulement
ung an apres le deces [et] trespas dudict
testateur asscavoir la somme de vingt cinq
escus a trois francs piece monoye susd[ite] a
prandre sur le bien [et] heritage diceluy oultre
[et] par dessus les sommes [que] ledict AVID
testateur a dict luy avoir recogneu dans
son contrat de mariage [et] aultre la donna[ti]on
par luy a elle faicte en augment de dot
[et] en cas de survivance pour en faire jouir
et disposer a sa toutale volonte [et] avec
ce a voulu [et] veut quelle soyt contente la
faisant pour ce son heritiere particuliere
plus a legue [et] legue ledict testateur par
mesme droict de legat a tout ses parents
allies [et] au[tr]es que pourroint demander et
prethandre quelque chose sur sondict bien et
heritage la somme de cinq soulz et avec
lesquels veut [que] soict contants et daultant
le chef [et] fondement des chascuns testement
est l'institu[ti]on dheritier a ceste cause le dict
Guilhen AVID testateur en tous [et] chascuns
ses biens meubles immeubles noms debtes
droicts actions rai[s]ons [et] causes p[rese]nts [et] advenir
quelconques ou [que] soint [et] en quoy que
consistent ou puissent consister a faict
institue et de sa propre bouche a
nomme [et] nomme ses heritieres universelles
asscavoir Catherine [et] Anne AVIDS ses
deux filhes legitimes et naturelles et de
ladicte Louyse VIALLE ensamble les
au[tr]es filhes posthumes [que] pourront
naistre du ventre de lad[icte] VIALLE du susd[ict]
mariage par esgalles parts [et] portions
les substituants des unes aux au[tr]es
vulgairement pupillairem[en]t [et] par fidei
comis en cas que aucune dicelles vint
a deceder sans enfans naturels [et] legitimes
[et] de vray et legitime mariage procrees
et venant le cas [que] sadicte fame Louyse
se treuvant enceinte du temps du deces dud[ict]
testateur [et] vint en lumiere [et] a naistre
ung ou plusieurs enfants masles en ce cas
ledict testateur a faict [et] institue ses
heritiers universels lesd[icts] enfants masles
a naistre dud[ict] mariage par esgalles parts [et]
portions les substituans les uns aux au[tr]es
et par ce moyen faict legataires ses deux
filhes Catherine [et] Anne ensamble lesd[ictes]
au[tr]es filhes a naistre du susd[ict] mariage
chargeant en ce cas lad[icte] Louyse VIALLE de
leur bailhe pour leur legat une somme
[que] sera par elle advise lors [que] lesd[ictes] filhes
viendront a se collocquer en mariage jouxte
la facculte du bien [et] heritage dudict AVID
testateur interesse curateur [et] legitime
administrateur de la personne [et] biens desd[ictes]
deux filhes nees [et] a naistre et des au[tr]es
enfans masles aussy a naistre dud[ict] mariage
ledict testateur a facit [et] nomme sad[icte]
fame Louyse la faisant dame maistresse
[et] usufruict de tout ses biens [et] heritage
dud[ict] testateur sans randre compte
ny prester aucun relicquat et ce tant quelle
vivra en ce monde soubs le nom vidual
dud[ict] testateur et non au[trem]ent la chargent
davoir soin desd[icts] enfans iceulx nourrir [et]
allimenter chausser [et] vestir dans sa maison
syuvant leur qualite [et] faculte dud[ict]
heritage soubstenant [et] payant les charges
diceluy chargeant aussy sad[icte] fame de fere
fere sulement ung invant[aire] domestic pard[evan]t
moy not[aire] [et] deux tesmoings des biens
meubles [et] immeubles dud[ict] testateur pour
la conserva[ti]on du bien [et] heritage desd[cts] enfans
apres le deces [et] trespas dud[ict] AVID. Et en
cas que de droict sad[icte] fame feut attenue
de randre compte [et] prester le relicquat
de lad[icte] administra[ti]on iceluy testateur des
maintenant comme pour lors a legue [et]
legue a sad[icte] fame par droict de legat
tout ce a quoy elle se pourroit treuver
debitrisse [et] relicquatrisse envers sesd[icts] enfans
sans en estre trouble ny rechercher par
quelconque personne [que] ce soyt. Prohibant
[et] deffandant tres expressement ledict testateur
a tous juges mag[ist]rats [et] off[iciers] de justice quel
[que] soint de juger ny intromettre en aucune
facon [et] maniere que ce soyt a aucune confection
dinvant[aire] des biens dud[ict] testateur moinque dy
mettre la main ains sulement veut [et] entend
[que] ce quil a cy devant ordonne soyt effectue
de poinct en poinct declarant ledict AVID
testateur debvoir legitimem[ent] a honneste fame
Anne VIALLE fame du s[ieu]r Louys FABRE
dud[ict] Cavall[on] la somme de quatorse escus a
trois francs piece sauf le droict de plus ou
de moinque quelle luy a realleme[ent] prestre
en divers fois [et] veu lad[icte] somme luy estre
randue [et] payer par sesd[icts] heritiers apres le
deces dud[ict] testateur comme aussy tout au[tr]e
debtes diceluy quil se treuvera debvoir legit[imen]t
executera de ce p[rese]nt testement a
faict [et] nomme mons[ieu]r Esperit LAMBERTY pre[tre]
[et] beneficier de leglise cathedralle dud[ict]
Cavall[on] [et] m[ait]re Dominique de LOURENS aux p[rese]nts
a donne plain pouvoir [et] authorite de fere
observer tout le contenu au p[rese]nt testement
et mesmes ce que touche le faict de son ame
cest son dernier testement nuncupatif [et]
dispo[siti]on finalle qua voulu valoir pour droict
de dernier testement [et] sil ne vault par
testement a voulu que vailhe par donn[ti]on
a cause de mort [et] par tout au[tr]e dispo(siti}on
de derniere volonte en la meilheure forme
que pourra estre vallable cassant [et]
revocquant casse [et] revocque ledict
testateur tous au[tr]es testements codocils
donna[ti]ons pour cause de mort [et] au[tr]es
dernieres volontes quil pourroit avoir
par cy devant faict le p[rese]nt testement
seule demeurant en ses forces vestu et
efficace. Priant les tesmoigns bas
nommes quil a faict en assemble destre
memoratifs de la p[rese]nte dispo[siti]on finalle
et moyd[ict] not[aire] den prandre acte [et] luy
en despesche [et] a sesd[icts] heritiers legataires
[et] au[tr]e [que] y auront interest ung ou
plusieurs instrumentz pour leur servir comme
de cou[ti]on de quoy a faict publie
[et] recitte audict Cavall[on] [et] membre bas
de la mai[s]on dhabita[ti]on dud[ict] testateur
en p[rese]nce des s[ieu]rs Esperit LAMBERTY p[re]b[t]r[e] [et] beneficier
dud[ict] m[on]s[ieu]r Dominicque de LOURENS d'Estienne
CHAMBAUD m[aitr]e Jacques DEBOUC Guilhaume
CLAMENS m[aitr]e Antoine BESET [et] Honnorat
MOULARD dud[ict] Cavall[on] tesmoingns a ce
requis [et] appelles [et] soub[sig]nes qui la sceu fere
[et] ledict testateur a dict [et] declare ne
scavoir escripre.
LAMBERT p[re]b[t]re p[rese]nt, Estieni CHAMBAUD, Dominique de LOURENS